يطول عمرك.. قصيدة للأم

    شاطر
    avatar
    فؤاد محمد أحمد
    عضو مميّز
    عضو مميّز

    ذكر عدد الرسائل : 222
    المكان : الخرطوم
    العمل : معلم
    تاريخ التسجيل : 22/02/2009

    يطول عمرك.. قصيدة للأم

    مُساهمة من طرف فؤاد محمد أحمد في الأربعاء 25 فبراير 2009 - 7:34

    يطول عمرك...
    أريت يا أمي عمرك يطول
    يغازل حلمك النجمات
    ويتمدّد غناكي فصول
    ترشرشي في الفيافي الضي
    تفرِّشي حنك المعسول
    يفيض شعري ويقول عنك
    وبتقصِّـر حروف القول
    أنا الزازيت بعيد منك
    براي في سكة المجهول
    وأنا الباريت حلم مجنون
    ودرباً أصلو ما معدول
    بدور يا أمي أرسم ليكي
    شيتاً في الغد المأمول
    عشان مستقبل الجايين
    أنا السائل وأنا المسؤول
    فهل صبرك عليّ يطول؟
    وهل صبرك شوية يطول؟
    معاي في زحمة المشوار
    حزن ساكنـِّي مابي يزول
    لهيب الوحشة حارق الجوف
    وسيف الغم علي مسلول
    وما عارف شنو الحاصل
    شنو الممكن...شنو المعقول
    بدور يا أمي أرجع ليك
    وأمش في دربك الممهول
    وبي أسياف غناي أقطع
    ظروف زمناً غبي وجهلول
    نعيش يوم بكرة في التاريخ
    ونشتل بي لقانا حقول
    أريتك إنت عمرك يطول

      الوقت/التاريخ الآن هو الثلاثاء 16 أكتوبر 2018 - 7:52