مكتبة الشاعر هاشم صديق

    شاطر

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:34

    قرنتية

    قرنتية ....

    .... لادبابة..برمائية
    لا جاسوسة

    لا مدسوسة
    لا غواصة روسية
    لاجندية في (حركة)

    لا مختلسة مال شركة
    لاقصفت حدود (فشلا)
    لاكسرت رصيف كسلا
    ولا معروفة (ختمية)
    ****

    قرنتية .....
    لاصعلوكة لبست (شورت)..
    لا بتعرف شنو الباسبورت
    لامحتاجة جنسية
    هي قايله النيل سقف بيتها
    وقايله ضفافه محمية
    جات منسابه عز الصيف
    قايله الناس بكرمو الضيف
    وقايله النيل امان والقيف
    ، وقايله العاصمه عصريه
    ****
    قرنتيه جات بصغارها دايره الخير
    لا شافت يفط تحذير
    لا نزحت تكوس تزوير
    لا جاطت حركة السير
    لا دارت وسام تقدير
    ****
    لا مستلفة عشرين وش
    لا بتعرف تعيش بالغش
    كان محتاجه بس للقش
    وجات احلامها دغرية
    لا بلعت عديل السوق
    لا نضمت بدون طايوق
    لا كنزت دهب او ماس
    لا ظلمت بدون احساس
    لا عصرت شباب الناس
    لا كتمت علي الانفاس
    لا قطعت عشم بي فاس
    لا داستنا زنديه ..
    ***
    قرنتيه..
    لا دست سلع في الخيش
    لا شربت مريسة العيش
    لا ضبطوها في التفتيش
    لا سجنوها شالو الفيش
    لا خانت قسم أو جيش
    ***
    لا اجتمعت بمستر )جون(
    لا أكلت مؤونة العون
    لاسدت علينا الكون
    لا سبت كتاب الدين
    لا سامتنا حمرة عين
    ولا باعتنا ضهرية
    ***
    قرنتية ..
    جات مشتاقه للخرطوم
    تزور احبابها خايفه اللوم
    تصيح وتنادي بالحلقوم
    جنينة النزهة وين يا زول
    ..
    لقت حال الجنينه خلا
    حليل زمنها وحليل اهلها
    لا قرنتيه لا أصله
    لا صوت ككو لا بغله
    لا حلوف

    ولا اسدا مهاب بالخوف
    لا نمرا يشد الشوف
    لا ضل فيل

    لا تيتل جريهو جميل
    ولا غزلان ولا طاؤوس يباهي الليل
    لا زفة طيور ونعام

    لا نمرا دفر قدام
    كل الشله يا قرنتيه في رمشة عين
    احالوهم لصالح عام
    تقول الدنيا مهديه
    قرنتيه ..
    جات زي ضيفه ما غاره
    لا محتاجه لي فيزا ولا تصديق علي زياره
    جات والشوق دموع حاره
    تجدد في العيون الشوف
    بين توتي وعلايل ابوروف
    قايله الدنيا لسع سلام
    ما خيم زمان الخوف
    لسه هناك ضفاف حره
    ما مطموره للمره
    قايله الناس بعزو الضيف
    ما بسوقوه لي حفره
    وجوار القيف
    ما بياكلوهو في السفرة
    ومصيرو مخيف
    قايله العاصمه ما غابة
    وقايله حقوقها محمية
    ***
    قرنتيه ...
    لا قدلت في شارع القصر
    لا حامت في وقت الحظر
    لا خشت علي المامور
    ولا نطت سلك او سور
    لا دخلت علي امدرمان
    ولا كسرت قفل دكان
    لا دفرت علي التلفاز
    لا عضت رجل فنان
    لا زاعت بيان للناس
    لا احتلت كمان حيشان
    ولا نصبت شبك للحش.
    جات بصغارا كايسه القش
    تلاقي القوت صبح محظور

    وخير البقعه جوه السور .
    سماحة الدنيا منسيه
    ***
    قرنتيه لا بتعرف عجن او لخ

    وجات احلامها دغريه عجب ساقوها جوه الفخ

    عجب من طولها وقعت طخ
    عجب
    سلخوها صبحية
    ونحنا بنسلخ الانسان كيف ما نقدر الحيوان
    عجب ....
    والدنيا عصرية ؟!
    قرنتية
    لا دبابة برمائية
    لا جاسوسة مدسوسة
    لا غواصة روسية
    لا جندية في حركة
    لا مختلسة مال شركة
    لا حزبية بعثية

    قرنتية

    هاشم صديق - الخرطوم - 11/8/2..1

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:39

    ست الشاي

    الرادي يساسق
    بين بريطانيا
    وبين أمريكا
    ...
    و(صابر) سارح
    لنفسو يصارح
    -يا صابر هوي
    رمضان جاييكا
    حجتيب من وين
    قروش السكر
    وحق الويكة؟!
    ..
    (الرادي) يناهد
    وسط الحوش
    بين (بن لادن)
    و(عمر المُلا)
    و(مستر بوش)
    -تصريح
    من لندن
    -أخبار
    من (غزة)
    وجيران صابر
    عاملين (قعدة)
    انقلبت (ندوة)
    في الكأس العاشر
    (بالعرقي) الداشر
    والليل مصبوغ
    بي رحية (المزة)
    ...
    الرادي يكورك
    وسط الحوش
    -افغانستان
    موت أفغان
    -مستر بوش
    وخواجة بيصرخ
    وصوته مرخرخ
    زي (حنكوش)
    -القصف يدك
    أركان (كابول)
    ...
    ووالدة (صابر)
    حاجة (بتول)
    مشدوهة تقطع
    عيش الفتة
    تكب سرحانة
    في موية الفول.
    -يوماتي عشاهم

    (فتة بوش)
    والرادي يساسق
    بين (بن لادن)
    ومستر (بوش)
    وصابر يطنطن
    -الصاح مقلوع
    السيف مرفوع
    الكلمة غموض
    والمغنى فروع
    الدنيا خراب
    والأقوى مهاب
    والعدل رهاب
    ...
    الليل مشروق
    بي فتة فول
    وصوت (الحاجة)
    الوالدة (بتول)
    يناغم صابر
    -شنو الإرهاب؟
    ويتمتم صابر

    قلـ...قلتي
    شنو؟
    وترد (الحاجة)
    -مالك مرعوب؟
    تتلفت ليش؟!
    تقول مـزرور
    بي عسكر وديش؟!
    سـألتك بس
    شنو الإرهاب؟!
    واتنحنح (صابر)
    صنقع ودنقر
    حك رويسو
    اتمدد وصنقر
    وقال للحاجة
    -سؤالك يمة
    جوابو كتاب
    لكن....
    لكن يا (حاجة)
    زي ما تقولي
    طلع ربّاط
    في الليل
    لي زول
    بي سيف مسلول
    وشال من جيبو
    قروش العيش
    وحق الفول
    أو زول آمن
    يقع في مكيدة
    يموت مكتول
    وزي تغيان
    على الفقران
    على المسكين
    على الأعزل
    على المشلول
    ...
    وتتدقق
    غبينة (الحاجة)
    زي راجمة
    وتصبح ناغمة
    -وحسع نان
    منو الرباط؟
    امريكا؟
    (بن لادن)؟
    ولا الأفغان؟
    من التغيان
    منو المسكين؟
    من المظلوم
    (مستر بوش
    ولا فلسطين؟
    شنو الـ......
    منو الـ....
    ...
    ضحك (صابر)
    وحك رويسو
    واتنحنح
    وقال للحاجة
    -يمة اتعشي
    أكلي البوش
    لو عارف ردود
    لي ديل
    ما كان الرويس
    مدووش
    ...
    سكت صابر
    رقد معبور
    وصوت الرادي
    لا في الدنيا
    لسة بيدور
    سرح صابر
    ودمو يفور
    نكش حزنو
    وقال لي نفسو
    من قلبو
    أريت الدنيا
    حسه تغور
    ...
    سمع صوت أمو
    تاني يلح
    -دحين يا وليد
    بدور أسأل؟
    ويرد صابر وضيق العبرة
    طعمو ملح
    نعم يمة
    قايلك نمتى
    وترد الحاجة
    أنوم كيفن
    وصوت الرادي
    في أضني
    زي مكنة؟!
    بدور أسأل
    دحين أمريكا-
    ما ياها
    العذابا دنا؟؟!
    ...
    ويرد صابر
    وضحكو علا
    -عذاب أمريكا
    ولا هنا؟؟!
    عذاب أمريكا
    ولا أنا؟
    ويصن لحظات
    -دحين يمة
    -ورمضان جاي
    هم أمريكا
    ولا اللقمة
    والويكة الرادي يساسق
    بين بريطانيا
    وبين أمريكا
    ...
    و(صابر) سارح
    لنفسو يصارح
    -يا صابر هوي
    رمضان جاييكا
    حجتيب من وين
    قروش السكر
    وحق الويكة؟!
    ..
    (الرادي) يناهد
    وسط الحوش
    بين (بن لادن)
    و(عمر المُلا)
    و(مستر بوش)
    -تصريح
    من لندن أخبار
    من (غزة)
    وجيران صابر
    عاملين (قعدة)
    انقلبت (ندوة)
    في الكأس العاشر...
    ترد الحاجة تفتش لكيس
    تمباكا
    في الكراب
    نقول همين
    عذاب وعذاب
    تخت السفة
    وتبرطم
    -دحين يا وليد
    ده مو الإرهاب؟!!
    ...
    ويصن الليل
    ورأس صابر
    يدقدق ساي
    يشرق جاي
    يغرب جاي
    - كراتشي
    - أباتشي
    - أنقرة
    - عنقرة
    - ربع الويكة
    - صوت أمريكا
    - جمرة خبيثة
    - مكيدة دسيسة
    - بي. بي . سي
    - أي. أن. تي
    - سي. أن. أن
    - توني بلير
    - كلام الطير
    - خبر وحواشي
    - إبراهومة
    - أموكاشي...
    ويقع صابر
    في بير النوم
    ويشوف روحو
    بدل (أمجاد)
    ركب بعشوم
    وشاف الناس
    توسوس ساي
    خبر يا هناي
    ست الشاي
    أف. بي آي
    وأحمد بيه
    سي . أي. أيه
    ووسط الموز
    لقينا (كروز)
    -برج كلتوم
    ملان بحمام
    وقع صاروخ
    شق حشاهو
    سكن جواهو
    سوا حطام ويغوص صابر
    غرق أكتر
    في بير النوم ويشوف الحاجة
    امو (بتول)
    وسط الزحمة
    رافعة أيدها
    بي قندول
    تكورك وتهتف
    - لا أمريكا
    - بل فتريته)
    (أنحنا الساس)
    رافعين رأس
    ما ببنتراجع
    ما بنتهان
    ما بنخاف
    الأمريكان
    ...
    ويشوف صابر
    بيوت الحلة
    تتغامز
    وتتريق
    على الحاجة
    وتتلامز
    ووسط اللمة
    صوت الحاجة
    عالي فصيح
    (تشيلو الريح)
    ...
    صوت الرادي
    مابي النوم
    الموت أخبار
    الظلم حصار
    الرعب خيار
    والليل حزنان
    الليل عريان
    والقمرة هدوم
    الليل مفضوح
    والنجم كتوم
    الدينا تصن
    لقيامة تقوم
    صابر مجروح
    في نومو
    يئن
    وفي الرادي تجن
    بالتار
    (بيق بن)
    والنشرة تجيب
    أخبار الشوم
    كابوس صابر
    قفة خضار
    سوت جنحين
    طارت لي فوق
    والفاقة مطار
    ...
    كابوس صابر
    يعلم أيه والدنيا مصالح
    وسي. آي. أيه
    ...
    كابوس صابر
    الناس بتوسوس
    وتنضم ساس
    ست الشاي
    أف بي آي
    ...
    كابوس صابر
    الدنيا مغازي
    يموت الحب
    ترمي أخوك
    في بطن الجب
    وتترتر غادي
    تناصر الغازي
    ...
    كابوس صابر
    الكلمة ضحية
    إرهاب مشروع
    وإرهاب وحشية
    ضحايا غبش
    وضحايا غنية
    ...
    كابوس صابر
    الناس (بالقرجة)
    تقيف للفرجة
    تغير لونها
    ميتين درجة
    ...
    كابوس صابر
    هم الويكة
    والفتريتة
    ونار أحزانو
    ونار أمريكا
    ...
    كابوس صابر
    الصاح مقلوع
    السيف مرفوع
    الكلمة غموض
    والمعنى فروع
    الدنيا خراب
    والأقوى مهاب
    والعدل رهاب
    الرادي يلغلغ
    وسط الحوش
    بين (بن لادن)
    و(عمر الملا)
    ومستر بوش
    - أفغانستان
    - موت أفغان
    - القايمة تطول
    - عراق.. سوريا
    - جنوب لبنان
    - وما معروف
    - تاني كمان!
    تجي الحملة
    عقاب جملة
    (على الإرهاب)
    ...
    على الإنسان؟!
    القصف يدك
    أركان كابول
    ووالدة (صابر)
    حاجة (بتول)
    حلمانة تقطع
    عيش الفتة
    تكب سرحانة
    في موية الفول
    يوماتي عشاهم
    فتة (بوش)
    والرادي يساسق
    بين (بن لادن)
    ومستر (بوش)
    ...
    صوت الرادي
    مابي النوم
    والليل حيران
    الليل حزنان
    الليل عريان
    والقمرة هدوم
    الليل مفضوح
    والنجم كتوم
    ...
    كابوس صابر
    قفة خضار
    سوت جنحين
    طارت لي فوق
    والدنيا مطار
    ...
    كابوس صابر
    صوت مبلوع
    حق مقلوع
    والموت بالجوع كابوس صابر
    يعلم أيه
    والدنيا مصالح
    وسي. آي. أيه
    ...
    كابوس صابر
    الناس بتوسوس
    وتنضم ساي
    ست الشاي
    أف. بي. آي

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:42

    ياتو ورقاً
    اتمضا
    وكان دوانا
    من الأذى؟!
    ...............
    ياتو ظُلماً
    اتنسى
    بس عشان
    مكَّاً ضحك
    أو عشان
    سِيِداً عفا؟!
    ياتو خُطباً
    في إضينّا
    جَملّت في عيونّا
    شينه؟!
    وياتو تلفاز
    ياتو رادي
    ياتو راوي
    ياتو زينه
    لَبسّت عريانّا
    توب
    وبدّلت طعم
    السخينه
    وياتو حلماً
    في عصورنا
    ما صبح باللّت
    عجينه؟!
    وياتو مركب
    في بحَرْنا
    طاش صوابها
    وهدهدت أعصابها
    مينا؟!
    وياتو راجلاً
    بالبشارة
    جانا
    من أقصا
    المدينه
    و بالبشاورة
    كان مسح
    سبورة الرحلة
    الحزينه
    وكان غرس
    في الليل
    بشارات الرتينه
    وشَفانا
    من جوع
    أو حفا؟!
    ياتو مسرح
    ابتدا
    واسيادنا
    ماكانوا الفوارس
    ونحنا كومبارْس
    الحوادث؟!
    وياتو والي
    في المنابر
    ما خطب فينا
    ونَهَر
    مليون شهر
    ونحنا قاعدين
    في البنابر
    قدامو
    زي شُفَع مدارس؟!
    وياتو دستور
    ما صِبِح في راسنا
    قمبور
    وياتو اعلان
    أو بيان
    ما انْغرس
    في حلوقنا أحزان
    وياتو لحماً
    للعضام
    يوماً رجع
    وياتو آذان
    يا عسس مالطا
    انسمع
    وياتو صفاً
    إنقسم
    وعاد يتمم
    وانجمع؟!
    وياتو رُتبه
    وياتو قُبه
    ما بقت
    في اللفّه كُبه
    وياتو صوتاً
    من وجع
    دمدم هتف
    ما انقطع حبلو
    ونزف
    وبالأوامر
    والكوامر
    اتنفا؟!
    أحلام بتنقح
    طول دبابيس
    الليالي
    ولما جمر الدنيا
    يصبح
    وما انجبر
    يا دنيا خاتر
    لسه لافّانا
    المواجع
    والصفافير
    والمواتر
    .....
    سِيِداً مرق
    سيداً رجع
    مكَّاً دخل
    مكَّاً طلع.
    شيخاً لَبَد
    شيخاً نَبَل.
    سيفاً ضِحِك
    كشّر كَتَل.
    ورقاً جبل
    ورقاً سَهَل.
    صِدْقَاً أَفَل
    كِضباً لمع.
    صنماً وقف
    صنماً وقع.
    كفاً عصر
    كفاً قلع.
    ...........
    والأماني
    لسه في حال
    (الصواني).
    لقمه طاعمه
    وبي كرامه.
    حبة احساس
    بالسلامه
    رجعه لي قيف
    الشهامه
    مَرْقة
    من عصر
    القيامه
    فرحة ما تكمل
    ندامه.
    لاها قصراً
    أو دواير.
    لاها بستان
    أو مناظر
    لاها مول
    في وادي شنقول
    وكبري طاير
    في القماير
    لاها أموال
    في الخفا.
    أعفونا
    من كُتْر التحالف
    و التخالف
    والشراكه
    والشياكه
    والمواثيق
    والتواثيق
    والورق.
    كم مره
    أذَّنا الفَجُر
    قبال نفيق
    شَفَقُو انسرق.
    كم مره
    بشرتو الخُشوم
    أكلت عديل
    مُر الصفق.
    كم مره
    جربنا البيان
    كم مره
    جبناكم عيان
    نِشِف البلد
    قلبو انحرق
    ........
    الشعب وين
    يا مؤمنين
    ودستورو
    في حَله انسلق؟!
    و القسمه
    في ثروة منو
    والشعب
    بي جوعو انشرق؟
    والنسبه
    في سُلطة منو
    وسُكرنا زاد
    بالنسبه
    في الدم انطلق.
    ........
    انتو الفوارس
    والمكوك.
    الدايْر يبيع
    تدوهو
    في جاهكم يلوك
    واللسّه
    ماسك في الجَمُر
    ياريتو بس
    يلقى النبق
    والجوع يقَطِّع
    في الحشا
    ألفين سنه.
    أدونا بس
    حق الصَبُر
    خلونا
    من غش الكلام
    وعد الرخا
    وليلة القَدُر.
    خلونا
    من كضب
    البشاير
    في القصايد
    والجرايد.
    أدونا بس
    حق الفطور
    أعفونا
    من حق العوايد
    و النفايات
    والدوا
    وكفايه
    فك عكس الهوا
    ............
    يامؤمنين
    الشعب وين؟
    تاكلو الثمر
    والشعب تدوهو
    النوا؟!
    خلونا
    من حشد المواكب
    بي أجاويد الجرايد
    والإذاعه
    والإشاعه
    وبي مناشير
    الوظيفة.
    كم مره
    دقيتو النحاس
    في لمبه
    طقّت وطرشقت
    أو زره جاتكم
    حتى لو كانت
    خفيفة
    أو نِبْلَه ناشت
    باب جنابكم
    وعطسه قَدّت
    للرهيفه
    أو هاجسه
    مرقت
    من عقول
    عَسَس الخليفة.
    ........
    خلونا نمرق
    من هدومنا
    ونغلي نهتف
    للكرامه
    والشهامه
    والحساب
    الفي الكتاب
    وللرغيفه
    وللحليفه :
    - مافي جُحراً
    تاني بلسع.
    ومافي عذراً
    للفوارس
    تاني بشفع.
    ومافي ومضاً
    في عقولنا الصاحيه
    نلقاهو انطفا
    ومافي رجعات
    تاني للشوك
    والحفا.
    ورونا كيف
    ننسى الكوارث
    يا فوارس؟
    الإنكسار
    الإنشطار
    الإنحسار
    الذِلّه لي ناساً
    كِرام
    موت العُروض
    دك الفروض
    بلْع الحرام.
    ورونا كيف
    بس لينا يوم
    بعتوا الترام؟
    ورونا كيف
    لمعت وشوش
    كبرت كروش
    وأنحنا ناس
    ربط الحزام؟!
    كَسَر الخراب
    مِرْق البلد
    حتى النفوس
    صبحت حطام.
    أدونا بس
    فَرْق العُمُر
    سووا المعاش
    حبة لحم
    فوق العضام.
    أوضحكه
    من جوه القَلِب
    أو لمبه
    في جوف الضلام
    ولو أصلو موت
    أدونا موت
    حق الكِرام
    .........
    خلونا
    من جنس التخاريف
    في الثقافه
    ومهرجانات السخافه
    أدونا بس
    حبة كُنافه
    ..............
    ياتو حرفاً
    يوم هتف
    بي غُبنو
    أو صادم وقف
    أشّر
    على حق اتلهف
    أو على خَطْف
    الشَرَف
    أو غَنّا
    للناس والشَمِس
    واتحدى للظلمه
    وعزف
    وما اتخنق صوتو
    ونَزَف؟!
    ...........
    حريه وين
    يا مؤمنين؟!
    صوتنا وين
    يا موحدين؟
    ............
    الشعب وين
    في السُلطه
    يا أُمة محمد
    ويا يسوع؟!
    القسمه
    في المال والحُكُم
    ولاّ المظالم
    والدموع؟!
    ...........
    يا شراكه
    يا تحالف
    يا تخالف
    يا شياكه
    يا قِباب
    يا رهاب
    يا خطابه
    يا شيوخ
    يا شلوخ
    يا مهابه :
    - انتو الفوارس
    في المسارح
    ونحنا كومبارْس
    الغلابه.
    انتو أبطال
    القصص
    نحنا التلاميذ
    في الحصص
    انتو الأكابر
    في المنابر
    ونحنا
    حُراس المقابر
    بِتْصَدِقوا
    أو تضحكوا؟!
    قسماً عديل
    يا نبقى
    نحنا الساده
    والحق والقياده
    وانتو خُدامنا
    وزياده
    نطلع نكون
    نحنا المنابر
    والإمامه
    أو تقوم بينّا
    القيامه.
    الشعب ما ضحكه
    وقمامه
    والصَنّه
    ما بر السلامه.
    .............
    يا ناس كفايه
    من خراب
    نُبل الضماير
    والهواجس
    في البشاير
    ومن طلاسم
    جايه باكر
    ومن تعاويذ
    الولاده
    ومن كضب
    يوم السمايه
    ومن تهاليل
    البدايه
    ومن عويل
    خط النهايه
    ومن صراع
    كل الديوك
    للكراسي
    وللولايه.
    يا مبيور
    ويا جَلاّبه
    انحنا الشعب
    سَدْرَنا ولّع
    وكَرْكَرْ تَب.
    حتفاوضونا؟!
    ولاّ نولِّع
    ونبدا حرابه
    نَخُش الغابه؟!
    ياتو ورقاً
    اتمضا
    وكان دوانا
    من الأذى؟!
    ..........
    وياتو ظُلماً
    اتنسى
    بس عشان
    مكَّاً ضحك
    أو عشان سِيِداً عفا؟

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:45

    عزم الغَلابة

    مسكين أنا

    ومسكين أبوى

    مسكينه أمى..وبرضه أختى

    كمان أخوى

    لكن - ورغمَك يا شَقَا-

    بَرضُه راكزين زى بَلد

    الليل سَرَحَ فيها ومشَىَ

    وسَاوم عيونها وحَنَّسَها

    ولا اتبَدَلت..لا استسلمت

    مسكين أبوى

    ضامِر مِتِل عوداً نِشِف

    ومسكين أبُوه

    السَّلَّ سيفو على المدافع

    وصاغ صباح مليون حَرِف

    ومسكينة أمى

    الما غِشَت درب الكتابة

    لكنها

    ساعة الحريق الشال عُمُر

    ناساً عُزاز نصروا الغلابه

    عِرفت تَخُط حرفين كبار

    رَسِمُهم حِلاَ

    ولاَ مِن لَمَع لون الحِبِر

    كل البلد صِبحَت دروب

    مكتوبه لا




    تَعَب حُرُوفها

    ضِحكت عيونها

    كلام أكيد قالوه غيرى

    ودايِر اقول ابيات جديده.

    وشان أطوّع للحروف

    العارفها مرات عنيده

    ساهرت زى قطرة مَطَر

    فىجناح سحابة.

    وقلت يا أقدر أقول أوصافى فيها

    او أصوم من الكتابة.



    حاولت أرسُم ضَحْحَتَها

    كل ما أحَنِّس فى الحروف

    ألأقاها تابى

    حاولت تانِى

    بديت أعيد رسم الحروف

    إصرارى!؟..لا لا

    ريدى ليها الطاغى جابها

    وفرحت لاَ مِن دمعة رَقَشَت

    وخُفتَ تنزل

    وللخطوط تَمسَح تَبَدل

    وَقَفتَ حيلى بعيد مشيت

    قَبَّلتَ تانى رجعت جيت.

    زِدت الخطوط عايَنْت فيَها

    لقيت نجم شَعّ وْحَضَن

    وردة بَنَفسج جوّه غابة.

    وكلمة احبك فى الفروع

    مكتوبة بى صدق الغلابة.

    وكوخ مَحَكّر فى القمر

    قلبى البِرِيد لى بابه شابا

    وفكرت تلت الليل أفسّر

    وين جمال ضحكة عيونها

    وين؟وين؟ وهل..؟

    وهل أحرف كلامى الفيها دونها؟

    وحاولت تانى

    ومن جديد سِخَت الحروف

    زدت الخطوط اكتر كمان

    بَسَمت عيون السمحه من وسط السطور

    وشوَيّه من الدايروبان.

    وبديت أزيد... ومرات اعدِّل

    ولما ألقىَ وَصِف جديد

    أفرح واقيف فى الساحه أقدِل

    وفى النهاية لقيت عيونها.

    والبَرِيق الزى شموس حَاضِن سنونها.

    والخدود والجيد... وخصلاتها

    البِزِيد غزل النسايم فى جِنونها

    كلهن ضاحكين بتَاوقوا من القصيدة

    إلإ آه أنا من حروفى الفيها عاجزة

    كل الكتبتُه محال يكون أبيات جديدة

    محال يكون أبيات جديدة

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:48

    وصف السمحـــه - هاشم صديق



    سواد ليلتين طُوال بالحيل
    ضفايرِك ديل

    وطرفك لما حام فوقى

    غلبنى مع البِغَنّو الشيل.

    وأمانه وكِت أشوف رقصِك

    واشيل شبال

    أبيت فى حال

    تقول فارساً رَمَنُّو الخيل



    أمِس فى بيتنا دقّ الباب

    وزار حُسنِك طِرَى وطلَّ

    وكِت سبق السلام خَطْوِك

    رجَف قلبى وركع صلى

    وبسيمتك لما غَنَّت لَىْ

    وطاش صبرى وغِلِب قَلّ.

    رفعت أيْدَى لخالقِك فوق

    وقُت يا ناس أريد الله

    وأحب الله



    هى عيون شنو؟

    دى المافى زول شافها وسِلِم

    حتى الزمان عِشق الوَصِف

    فيهن سَرَح غَلَبُو النَّضِم

    زى سيف سَنِين عينيكى ديل

    البدْنَا وين يرجع يِلِم

    لو أقدَرِن يوم بالغُنا

    يا دنيا داك يوم المُنَى

    وبعد الوصف يحلا ويتم

    إن كان أعيش وان كان أموت

    يا سمحه أبداً ما بِهِم

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:51

    هاشم صديق
    همس الشوق


    يا ريتنى لو أقدر أقول

    فيكِ الكلام الما انْكتب

    واجلى المقاطع بالدهب

    وافرد صباح حُسنِك وشاح

    يمسح عذاب عمرى المسطرّ باللهب



    بريدك...

    كلمه كان رفّت

    يِهش ثغر النجوم ويسطعَ

    ولما ينادى همس الشوق

    يقيف كل الزمن ويسمع

    عيونك ديل عيون أهلى

    حُنان زى نغمة فى مقطع

    وطُهرِك تاج جواهرهُ العزه

    وانتى العزه ليك تركع

    بحبِك يا صباح العيد

    ويا فَرَح العريس السار

    واحِسّك فى سما الأزمان

    شمس بِتضَوى للمشوار

    زمان يا حلوه ساقنى الليل

    وغِبْتَ وضعتَ فى الأسفار

    ولّما لقيت عيونك ديل

    بديت اعشق عيون الدار



    وَحَاة ريدى اللى شاف طيفِك

    كتير قُباّل يلاقى ويشوف

    جراح الماضى بيك نامت

    وغابت كلُ رعشة خوف

    بحبك ومافى غيرك نور

    يهِل ويغمرُ طريق الشوف

    وما فى بَلَاك نور بِسْطَع

    ولا فرحاً يسوقنى يطوف

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:54

    السحاب المكفهر


    منديلُكِ المغزول

    لا يكفى

    لمسحِ الحزن عن وجهى

    وعن مطرِ الأماسى.

    هذا السحابُ المُكفَهِرُّ

    ببابِ عمرى

    إنْ هَمَى

    لًنْ أستجيرَ

    بغيرِ سبرٍ

    بنزحُ المطرَ السخينَ

    عن المآقى.

    يزرعُ البرقَ الصدوقَ

    على مداراتِ القوافى.



    هومنجمُ اللهثِ الحثيثِ

    على وميضِ

    الجمرِ

    فى السفرِ الطويلْ.

    بسمة’’ خضراء

    فوق غار المستحيلْ.

    وتأرجُح’’ وتماسك’’

    فى أسرِ

    موج الارخبيلْ

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:56

    هاشم صديق

    بريق الماس



    عيونك...

    سمرة العَسَل الموشَّح

    بى بريق الماس.

    ولما رموشك الحلوين

    يَرُشَّن فوق تعبنا نِعاس

    يِرِف همس الحلم فى الروح

    بِجِنحين من صدى الاجراس.

    ويسيل صوتِك

    ترانيل زفّة للجنه

    وكلام ولهان كِتِل جَنَّ

    واقيف حيران أنادى الطيف

    واخاف أسرح..أقوِم كيف

    وانا المشدوه مع العَسَل

    الموشَّح بى بريق الماس

    منو البِقْدَر يشوف عينيك

    ويفيق ويِرْجَع يحس بالناس

    ولما عينيكى يا حلوتنا

    تتِشَاقا

    وتقول باكِر وفى الأحلام

    حَنِتلاَقى

    أنوم واصحا

    وانوم تانى

    عشان القاكِ يا سمحة

    ويُمر الليل . وليل بكره

    وما القاكْ

    ويصير وعد العيون ذكرى.

    واقابلِك فى الحقيقه قريب

    واعاتبِك حول

    وتتشاقى وتقولى نسيت

    واعاين فيكِ زول مذهول

    بَرِق شَعَّ وسَمَار مغزول

    واقول يا ناس أنا المكتول

    ولما أتوه مع السرحان

    أقوّل..ياربى يا فنان

    عيونها عُزاز...

    طَرَب حَزنان فِرِح مره

    حروف آيتين

    تَسَبِّح بى قُدُرْةَ الله

    يقين إنسان لِقَى التوبه.

    نَقرة طار فى إيد مدَّاح

    ونَشوَة غابِّى فى النوبه.

    يا ريت فى عيونها إتحَكّر

    أكان ترضى

    أنوم واحلم مع المنظر.

    أعيش راهب على المحراب

    وأطل واضْفُر رموشه حجاب

    عَشان أحميها من الناس

    واعود تانى

    أغازل سُمره العَسَل

    الموشّح بى بريق الماس

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 11:58

    لندن

    سمعت بيكْ

    قُبال أجيكْ

    وحلمت بيكِ مليون شهر

    وجيتك مَحَكّر فى جناح

    شاقَّى السحاب

    قاطْعَ البَحَر

    شايل معاى شنطة هدوم

    حزمة كتب..وجواز سفر

    ونزلت بالشوق والسؤال

    خطواتي تاهن في الزحام

    وقُبَال أقول ليك السلام

    يَبّسنى فيك برداً مطر

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:01

    هاشم صديق
    سحـــر الهــوى

    أيا نفس الهوى

    الممدود.

    ويا طل السَحرَ

    نقّط

    على فرع الاسى

    المشدود

    ويا باب المنى

    الفتَّح

    على درب الهوى

    المسدود.

    نَقَعِ صوتِك

    سَكن بيهو السلام

    في الروح.

    ليك بدّع

    وتر قلبي

    اتترنم نبض زمني.

    وبيك قِدْرَت

    جروحي تروح.

    عليك تاوق

    عليك تاوق

    دَغَش موعود

    وانعتق الفرح

    رفرف

    واتْهَدَّت سدود

    وسدود

    أيا حُضن الهوى

    الأرْحب.

    خليتي الشَمسِ

    أقرَب.

    كللتي الجُزُر بالغار

    وعمَّدتي الحنين

    بالنارِ.

    ورَصّتي النجوم

    أسرار

    وجَّملتي البلد

    أعذب.

    ومديتي الأمل

    والايد

    سويتي العجب

    أعجب.



    وقع سور الأسى

    الممدود

    وانفتحت

    حدود في حدود.



    أيا نَفَس الفضا

    الممدوِد.

    ويا طَل السَحَر

    نقَّط

    على فرع الاسى

    المشدود.

    رجَّعتي الوجود

    موجود

    رجَّعتي الوجود

    موجود

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:05

    هاشم صديق
    كلام للحلوة



    لما شُفتِك

    ليلِى ضَّو وبَقَّ نور

    ونرجس الجنه المفرهد

    رفّ بى جِنحَات عطور

    وغنَّى فارسِك

    خَتَّ صورتِك فى الإطار

    فى الليالى نَجِم يِلالى

    ونسمه فى وهج النهار

    وقال فى وَصفِك لما بنتى

    أحلى مِنِّك . برضُه إنتِى

    وما فى غيرِك زول معانا

    حتى كان يا سمحه غِبتى



    ومَرّه جَالَن الف خَاطِر

    بى عيون عقلى المسَاهر

    فجأه عينيكِ الحبيبه

    !قالو سارح وين مِسَافِر؟

    عِشتَ قولِن شيل وصَفقَه

    وقُلت بس يا ريتنى القى

    همسه فى حُلم الأميره

    أو سَبَايب فى الضفيرة

    أو عِقيد فى تِبرِ جيدها

    أو قليب فى راحة ايدها

    يا زمان أسمعنى واكتب:

    البَرِيدها وريدها سِيدى

    وريدِى سِيدَها

    الزمان لوحتى بالغ

    ما أظِن فى زول يعيدها.

    يا حَلاتِك

    مره همسه .. ومره نَسمَهومره هَلّت نَجْمه غابت

    ومره صَحْوَة غمزه نامت

    ومره ضحكه تَرَضِّى شوقنا

    ومره كلمه تضِّوى فوقنا

    ولمّا نسرح فيكِ قَادلَه

    زى ملايكه علينا نازله

    بَس نغنى:

    يا حلاتكُم يا أهَلنَا

    يا مصابيحنا ونجومنا

    الضّاويَه فى واحات زَمَنَّا

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:07

    هاشم صديق
    حروف أسمك


    حروف اسمِك

    جمال الفال

    وراحة البال

    وهجعة زول بعد ترحال

    وتنّية حلوة للشبال

    ودنيتنا ومشاويرنا

    وغنواتنا الى ما بتِنقال



    حروف اسمِك

    نجوم ركّت على الياسمين

    فرح فى عين جمالها حزين

    أساور فى إيدين طفلة

    بتحفظ فى كتاب الدين

    زَفَافَ عاشقين بعد فرقه

    وسط باقات دُعَا الطيبين

    حروف إسمِك

    عقد منضوم بخيط النور

    وطلة وردة من السور

    ونغمة تنادى من طمبور

    وشُعلة فرحة فى الوادى

    تَشِع جَذلانه ليها شهور



    حروف إسمِك

    وَكِت أشتاق وأرحل ليك

    وأسرح فى عسل عينيك

    بِتَحضِنّىِ......

    قَبُل ألمسَ حرير إيديك

    تأرجِحنى..وتَفَرحنى..وتخلينى

    أدُق سدرى

    وأقيف وسط البلد واهتف

    بريدك يا صَباح عمرى

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:10

    شكراً جزيلاً .. هاشم صديق


    شكراً جزيلاً
    للخناجر ..للمغايس.

    للمتاريس..للدسايس

    للطريق

    لامن يضيق.

    للوَجَع

    سوّى البِدَع

    فَتّح مداَرس



    شكراً جزيلاً

    للأمل وسط السراب

    لي حُراب

    ناساً قراب

    للعذاب

    في كُلِّ باب.

    للمَحكّات العجيبه

    والمشاوير الغريبه.

    لي تمن

    عِشْق الوطن

    جمرِ الضريبه.



    شكراً جزيلاً

    للعُصار.

    للغُبار.

    للبروق

    الباقّه نار.

    للاسى.

    اللفّ الجزيره.

    للأذى

    الكتب الغنا

    وضَوّ البصيره.



    شكراً جزيلاً

    لي سلاطين

    الحساده.

    للصعاليك

    والسَياده.

    للإبر

    فوق الوِسَادَه.

    للحُفر

    في كُلْ ممر.

    للركوب

    وسط الخطر.

    لي ملوك

    فن النميمه.

    للأباطيل اللئيمه

    والأساطير

    القديمه.

    لي جَبُر

    كسر العزيمه

    والعبور

    فوق الهزيمه

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:17

    حاجة فيك
    هاشم صديق

    حاجة فيك
    تقطع نفس خيل القصايد
    تشده أجراس المعابد
    توهتنى .. جننتنى
    جننت حرف الكلام
    وبرضو أدتنى السلام
    ********
    حاجة فى شُرف المداين
    وفى غرف كل السفاين
    جوّة فى عمق المناجم .. والعيون
    حاجة زى ماتكون محلـّق فى العواصف
    فجأة .. تهبط لى السلام
    حاجة زى نقر الأصابع
    لمـّا ترتاح .. لى الموسيقى
    حاجة زى أخبار .. تناغم من جريدة
    حاجة زى وتر الموانى
    لمـّا يصدح لى سفينة
    .. حاجة فيك
    *********
    حاجة فيك
    لا بتبتدى .. لا بتنتهى
    خلتنى أرجع لى القلم
    وأتحدى بى الحرف .. الألم
    وأضحك مع الزمن .. العريض
    وأنسف متاريس الطريق
    وأعرف متين أبقى المطر
    وأفهم متين أصبح حريق
    .. حاجة فيك..

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:22

    ميـــلاد


    طالعه
    من خاطْر البَحَر.

    مغسوله

    زي قمر السَهَر.

    مرسومه

    بي شَفق الزَهَر

    طالعه
    من زَبد البَحَر.

    الموج على شَعْرِك

    عَزَف.

    الموج على نهديكْ

    هَتَف.

    الموج على ساقيكْ

    وقَف.



    طالعه

    من قَلْب البَحَر

    مكتوبه

    بي قَدَر الصُدَف.

    عينيكْ بَرَق

    شوقِن لَصَف

    رقص المُحار

    ضحك الصَدَف.

    طالعه

    من حلم البَحَر

    ايديكْ

    محنَّنه بالشَفَق

    ضحك مِشَعْشِع

    بالألق.

    تاجِك

    مرصََّع بالصَفَق.



    طالعه

    من فَجْر البحر.

    حُضنك

    هَمَسْ شعْر الصباح.

    خَتَّ النُقط

    فوق الصَرَاح

    ضوَّع عبير

    ورد الجِراح.

    أشَّر

    على الزمن الشَرَق.

    قابض

    على جمر الورق.

    خايض

    على لهب الشَفقَ.

    طالعه

    من عُمق البَحَر

    الموت يبوس

    خدك يطول

    يغمُر يباس

    قفر الأفول.

    قَصّر حضور

    زمن الذهول

    رجَّع نَفَس

    نبض الفصول.

    طالعه

    من خَاطْر البَحَر

    مغسوله

    زي قمر السَهَر.

    مرسومه

    بي شَفق الزَّهَر

    مدينة نور
    عضو فعّال
    عضو فعّال

    انثى عدد الرسائل : 83
    المكان : أمدرمان
    العمل : موظفة
    تاريخ التسجيل : 18/06/2009

    رد: مكتبة الشاعر هاشم صديق

    مُساهمة من طرف مدينة نور في الجمعة 12 فبراير 2010 - 12:25

    هذا المساءُ .. هاشم صديق


    هذا المساءُ

    هل يعود البرقُ

    رخواً

    ام يخط البرقُ

    !!"لا"؟



    هذا المساءُ

    هل يظل الليلُ

    طفلاً

    ام يئن الليلُ

    !من صفعِ الغناءْ؟



    استعينوا بالصلاةِ

    على الوباءْ.

    ثم أمشوا

    فوق أطرافِ الأصابعِ

    نحو"توشكى"

    ة"كربلاءْ".

    لا بأس من وترٍ

    ينوحُ

    ويستحيلُ إلى بُكاءْ.

    لا بأسَ من سيفٍ

    على رِجْلينِ

    عُقدا القرفصاءْ.

    لا بأس من سفرٍ

    ومن مطرٍ

    ومن سرجٍ

    على متنِ الهواءْ.



    هذا الشتاءُ

    هل يصير الماءُ

    ثلجاً

    !ماءْ؟



    دثرينى

    بالتحذلقِ عن زمانٍ

    سوفَ يغتالُ

    "الصفوفْ"

    وعن ثمارِ الصبرِ

    تحتضنُ "الرُّفوفْ"

    وعن غروب ِ الفقرِ

    وعن فتاوى القولِ

    فى حكمِ الغناءْ

    وعن التبرجِ

    والتبهرجِ

    وانحلالِ الخنفساءْ

    لا بأسَ

    !من دفءِ الهُراء

    لا تقولى:

    نحن بالاحلامِ حَلّضقنا

    على قوسِ قُزَحْ.

    بل ردّدِى

    فى الحلمِ جهراَ

    أنَّهُ صارتْ لدينا

    هذه السيارةُ الهيفاء

    أسموها"الشبحْ"

    هل يجوزُ الحلمُ

    شرعاً

    !أننصير الأغنياءْ

    ..............

    هل يجوزُ الحلمُ

    !فى هذا المساءْ؟

      الوقت/التاريخ الآن هو الجمعة 24 نوفمبر 2017 - 1:25